Конференсияи илмӣ-амалии имрӯз, 21.04.2024, дар Муассисаи ғайридавлатии таълимии “Донишкадаи тиббӣ-иҷтимоии Тоҷикистон” таҳти унвони «Нақши табиби оилавӣ дар пешгирии бемориҳои сироятии идора
Конференсияи илмӣ-амалии имрӯз, 21.04.2024, дар Муассисаи ғайридавлатии таълимии “Донишкадаи тиббӣ-иҷтимоии Тоҷикистон” таҳти унвони «Нақши табиби оилавӣ дар пешгирии бемориҳои сироятии идорашаванда байни кӯдакон» дар фазои илмии баланд ва муҳити мубодилаи таҷрибаи касбӣ баргузор гардид.
Дар кори конференсия омӯзгорон, донишҷӯён, инчунин олимони ҷавон ва меҳмонон аз донишкадаҳои дигари давлатӣ фаъолона иштирок намуданд. Чорабинӣ дар доираи кафедраҳои “Тибби оилавӣ” ва “Педиатрия” баргузор шуда, ба баррасии масъалаҳои мубрами соҳаи тандурустӣ, хусусан пешгирии бемориҳои сироятии идорашаванда миёни кӯдакон, равона гардид.
Иштирокчиён дар баромадҳои худ таъкид намуданд, ки табиби оилавӣ ҳамчун звенои калидии низоми кумаки аввалияи тиббию санитарӣ дар ташаккули фарҳанги саломатӣ, баланд бардоштани сатҳи маърифати тиббии аҳолӣ ва пешгирии бемориҳои сироятӣ нақши ҳалкунанда мебозад. Махсусан, таваҷҷуҳ ба масоили эмгузаронӣ, ташхиси барвақтӣ ва корҳои фаҳмондадиҳӣ миёни волидон ҳамчун омилҳои асосии коҳиши сатҳи беморшавии кӯдакон арзёбӣ гардид.
Қайд гардид, ки рушди салоҳиятҳои касбии табибони оилавӣ, такмили усулҳои пешгирӣ ва ҷорӣ намудани дастовардҳои муосири илмӣ дар амалияи тиббӣ, заминаи боэътимоди таъмини саломатии насли наврас ба ҳисоб меравад.
Дар анҷоми конференсия пешниҳодҳо ва тавсияҳои мушаххас ҷиҳати беҳтар намудани сифати хизматрасонӣ ва тақвияти корҳои профилактикӣ байни кӯдакон ироа гардиданд. Ҳамзамон, иштирокчиёни фаъоли конференсия барои саҳми арзандаашон дар кори илмӣ бо сертификатҳо сарфароз гардонида шуданд, ки ин иқдом ҳамчун ҳавасмандгардонӣ ва қадршиносии фаъолияти илмии онҳо арзёбӣ мегардад.
Ин гуна ҳамоишҳои илмӣ на танҳо барои баланд бардоштани сатҳи донишу малакаи мутахассисон, балки барои таҳкими ҳамкориҳои илмӣ ва рушди тафаккури таҳқиқотии ҷавонон аҳамияти хосса доранд.